പുരവഞ്ചി

കേരളം എന്ന പേരിനൊപ്പം ഇന്ന് ലോകമാകെ പ്രസിദ്ധമാണ് പുരവഞ്ചികള്‍ എന്നറിയപ്പെടുന്ന ഹൗസ്‌ബോട്ടുകള്‍. കേരളത്തിലെത്തുന്ന ഏതു സന്ദര്‍ശകനും വേറിട്ട അനുഭവമാകും പുരവഞ്ചിയില്‍ ഒരു കായല്‍യാത്ര. ഗ്രാമീണ ജീവിതം അടുത്തു കാണാനുളള അവസരമാണ് ഈ യാത്രയിലൂടെ ലഭിക്കുക. പഴയകാലത്ത് ചരക്കു കൊണ്ടു പോകാന്‍ ഉപയോഗിച്ചിരുന്ന വലിയ കെട്ടുവള്ളങ്ങളാണ് ഇന്നത്തെ പുരവഞ്ചികളുടെ മുന്‍ഗാമികള്‍. റോഡും ലോറികളും വന്നതോടെ ഇത്തരം കെട്ടുവള്ളങ്ങള്‍ സന്ദര്‍ശകര്‍ക്കായി രൂപം മാറി. ഒരു ആധുനിക വീട്ടില്‍ എന്തൊക്കെ സൗകര്യങ്ങളുണ്ടോ അവയൊക്കെ  ഈ ജലയാനത്തിനുളളില്‍ ഒരുക്കിയിട്ടുണ്ട്. അഞ്ഞൂറോളം പുരവഞ്ചികളാണ് ഇന്ന് കേരളത്തിലെ കായലുകളില്‍ സഞ്ചാരികളെ കാത്തിരിക്കുന്നത്. പുരവഞ്ചികള്‍ നിര്‍മ്മിക്കാൻ പ്രാദേശികമായി കിട്ടുന്ന വസ്തുക്കളാണ് ഉപയോഗിക്കുന്നത്. ഇതില്‍ വിളമ്പുന്നതും കേരളീയ രുചികളാണ്. പല ബോട്ടുകളിലും കായലില്‍ നിന്ന് അപ്പോള്‍ പിടിക്കുന്ന മത്സ്യങ്ങളും വിഭവങ്ങളായെത്തും.