വില്ലേജ് ലൈഫ് എക്‌സ്പീരിയന്‍സ്
കേരളത്തിന്റെ ആത്മാവ് നിലകൊള്ളുന്നത് അതിന്റെ മനോഹരമായ ഗ്രാമപ്രദേശങ്ങളിലാണ്. ഓരോ തവണയും കേരളം സന്ദര്‍ശിക്കുന്നവര്‍ക്ക് വ്യത്യസ്ഥ അനുഭവങ്ങളാണ് അവ നല്‍കുക. പാരമ്പര്യവും സംസ്‌കാരവും നിറം ചാര്‍ത്തിയ മനോഹരമായ തന്ത്രികളാല്‍ തീര്‍ത്ത സിഫണിയാണ് ദൈവത്തിന്റെ ഈ സ്വന്തം നാട്.
വ്യവസായവത്ക്കരണത്തിന്റെ കറുത്ത കൈകള്‍ തകര്‍ക്കാത്ത, നഗരവത്ക്കരണം മാറ്റങ്ങള്‍ക്ക് വിധേയമാക്കാത്ത നമ്മുടെ ഗ്രാമണജീവിതം സഞ്ചാരികള്‍ക്ക് ശാന്തവും തനതുമായ അനുഭവം പ്രദാനം ചെയ്യും.
ടൂറിസം മേഖലയില്‍ വില്ലേജ് ലൈഫ് എക്‌സ്പീരിയന്‍സ് എന്ന ആശയം കൊണ്ടുവന്നത് ഉത്തരവാദിത്ത ടൂറിസം മിഷനാണ്. തദ്ദേശീയ കരകൗശലമേഖലാ പരമ്പരാഗതാഗത കരകൗശല തൊഴിലാളികള്‍, പാരമ്പര്യ തൊഴിലാളികള്‍, ഗ്രാമീണ ജീവിതം എന്നിവ സംരക്ഷിക്കാന്‍ കൂടിയാണ് ഈ ആശയം കൊണ്ടുവന്നത്. കര്‍ഷകര്‍, ചെറുകിട വ്യവസായങ്ങള്‍, പരമ്പരാഗത കൈത്തൊഴിലാളികള്‍ എന്നിവര്‍ക്ക് പിന്തുണയേകിക്കൊണ്ട് പൊതുജനപങ്കാളിത്തത്തോടെ ടൂറിസം വികസനം സാധ്യമാക്കുകയെന്നതാണ് ഉദ്ദേശം. ആര്‍.ടി വില്ലേജ് ലൈഫ് എക്‌സ്പീരിയന്‍സിന് ഇന്ന് ആഗോളതലത്തില്‍ അഭിനന്ദനങ്ങളും അംഗീകാരങ്ങളും കിട്ടിക്കഴിഞ്ഞു. ഉത്തരവാദിത്ത ടൂറിസം മിഷന്‍ ഒരു പൂര്‍ണ്ണ ദിവസത്തെയും പകുതി ദിവസത്തെയും പ്രത്യേക പാക്കേജുകളാണ് വില്ലേജ് ലൈഫ് എക്‌സ്പീരിയന്‍സായി ഒരുക്കിയിരിക്കുന്നത്.
നഗരജീവിതത്തിന്റെ തിരക്കുകള്‍ക്കും ഏടാകൂടങ്ങള്‍ക്കും ഏറെ അകലെ സ്വസ്ഥവും ശാന്തവുമായ ഒരു ഗ്രാമത്തില്‍ കായല്‍പ്പരപ്പിലെ യാത്രകളും, പച്ചവിരിപ്പിട്ട പാടശേഖരങ്ങള്‍ കണ്ടും, തെങ്ങിന്‍തോപ്പുകള്‍ക്കിടയില്‍ നിന്നൊരു കരിക്ക് കുടിച്ചും, ചെറിയ രീതിയില്‍ മീന്‍ പിടിച്ചും, തനതായ ചില അനുഷ്ഠാന കലകള്‍ കണ്ടും ഒരു ദിവസം ചിലവഴിക്കുക. എക്കാലവും ഓര്‍മ്മിക്കാനുള്ള ഒരു അനുഭവമാകുമത്.
ഈ ഗ്രാമങ്ങള്‍ നമുക്ക് സന്തോഷവും സംതൃപ്തിയും പ്രദാനം ചെയ്യും.
വില്ലേജ് ടൂറിസം എക്‌സ്പീരിയന്‍സിന്റെ ഭാഗമായി ഉത്തരവാദിത്ത ടൂറിസം നൂതനമായ ചില ടൂറിസം പാക്കേജുകളാണ് മുന്നോട്ട് വച്ചത്. കണ്ണൂരില്‍ കല്ലിശ്ശേരിയിലെ നെയ്ത്ത് കേന്ദ്രങ്ങള്‍, കുഞ്ഞിമംഗലത്തെ വെള്ളോട് വ്യവസായം, തെയ്യങ്ങള്‍, കാര്‍ഷിക മേഖലകളിലെ സന്ദര്‍ശനം, പരമ്പരാഗത മത്സ്യബന്ധനം തുടങ്ങിയവ ഉള്‍പ്പെടുത്തിയാണ് ആര്‍.ടി. ഈ ടൂര്‍ പാക്കേജുകള്‍ മുന്നോട്ടു വച്ചത്. പുതിയ സാംസ്‌കാരിക ടൂര്‍ പാക്കേജുകള്‍, ഫെസ്റ്റിവല്‍ പാക്കേജുകള്‍, അനുഭവവേദ്യ പാക്കേജുകള്‍ (ടെന്റ് താമസ സൗകര്യമുള്‍പ്പെടെ), ഹെറിറ്റേജ് ടൂര്‍ പാക്കേജുകള്‍ കാര്‍ബണ്‍ ഫ്രീ പാക്കേജുകള്‍, ഫിഷിംഗ് പാക്കേജുകള്‍, ഫാര്‍മിംഗ് & ക്രാഫ്റ്റ് വില്ലേജ് പാക്കേജുകള്‍, സ്റ്റോറി ടെല്ലിംഗ് പാക്കേജുകള്‍ എന്നിവ ഉടനെ മുന്നോട്ട് വയ്ക്കും.
താഴെ പറയുന്നവയാണ് വില്ലേജ് ലൈഫ് എക്‌സ്പീരിയന്‍സിലെ സഞ്ചാരികളുടെ ആക്ടിവിറ്റീസ്.
ബാക്ക് വാട്ടര്‍ ക്രൂയിസുകള്‍
പ്രശാന്തവും നീലിമയാര്‍ന്നതുമായ നമ്മുടെ കായല്‍പ്പരപ്പില്‍ ഒരു ഹൗസ് ബോട്ടില്‍ ഒരു റോമാന്റിക് ഡേ ഔട്ട് ആയാലോ? കൊള്ളാമല്ലേ? ഉത്തരവാദിത്ത ടൂറിസം നിങ്ങള്‍ക്ക് കായല്‍പ്പരപ്പിലെ ആ നവ്യാനുഭവം ഒരുക്കുകയാണ്. ഒരിക്കലും ഈ അവസരം നഷ്ടപ്പെടുത്തരുതേ. നിങ്ങളുടെ മനസ്സിന് ഉണര്‍വ്വേകി സ്വസ്ഥതയോടെ മനസ്സിനെ തണുപ്പിക്കാന്‍ കേരളത്തിലേക്ക് എത്തൂ. ഈ കായല്‍യാത്ര അനുഭവിച്ച് നോക്കൂ....
ബോട്ടിംഗ്
നിങ്ങളുടെ മനസ്സിന് ശാന്തിയും സമാധാനവും സന്തോഷവും തരാന്‍ ഒരു ബോട്ട് യാത്രയ്ക്ക് കഴിയും. വില്ലേജ് ലൈഫ് എക്‌സ്പീരിയന്‍സിന്റെ ഭാഗമായി ഉത്തരവാദിത്ത ടൂറിസം നിങ്ങള്‍ക്കായി ഇത് പാക്കേജുകളില്‍ ഉള്‍പ്പെടുത്തിയിട്ടുണ്ട്.
കനോയിംഗ് ക്രൂയിസിംഗ്
കായല്‍പ്പരപ്പിലും ബീച്ചുകളിലും കനോ ക്രൂയിസിന് ഏറെ ആസ്വാദ്യകരമായിരിക്കും. രസകരമായ ഈ ക്രൂയിസിന് ഉത്തരവാദിത്ത ടൂറിസം മിഷന്‍ എല്ലാ സൗകര്യങ്ങളും ഒരുക്കിയിട്ടുണ്ട്.
വാക്ക് ത്രൂ പാഡി ഫീല്‍ഡ്‌സ്
ഒരു ഭാഗത്ത് നീലിമയാര്‍ന്ന കായല്‍പ്പരപ്പ് മറുഭാഗം പച്ചവിരിപ്പിട്ട പാടശേഖരം. വെള്ളത്താല്‍ ചുറ്റപ്പെട്ട ഈ പാടങ്ങളുടെ നടുവിലൂടെ വയല്‍വരമ്പിലെ നടത്തം. കായലും കണ്ട് പാടവും കണ്ടുള്ള ഈ നടത്തം നിങ്ങളുടെ മനസ്സിനെയും ശരീരത്തെയും ഒന്ന് ഫ്രഷ് ആക്കും. മോഹിപ്പിക്കുന്ന പച്ചപ്പിന്റെ ഈ സൗന്ദര്യമാസ്വദിച്ച് പാടവരമ്പിലെ ഈ നടത്തത്തിന് ഉത്തരവാദിത്ത ടൂറിസം വില്ലേജ് ലൈഫ് എക്‌സ്പീരിയന്‍സ് പാക്കേജുകളില്‍ അവസരം നല്‍കിയിട്ടുണ്ട്.
