मोहिनीचे लालित्यपूर्ण नृत्य हे केरळचे विशेष शास्त्रीय नृत्य आहे. शरीर आणि अवयवांच्या हळुवार, लालित्यपूर्ण, झोकदार हालचाली आणि अतिशय भावपूर्ण डोळे आणि हस्तमुद्रा या नृत्यात विशेष असतात. साधा पण सुंदर सोनेरी काठाचा आणि पांढरा शुभ्र वेष हा केरळी स्त्रियांच्या पारंपारिक वेषाशी मिळताजुळता आहे.

मोहिनीअट्टमचे मूळ हिंदू पुराणांमध्ये आहे. एकदा देव आणि दैत्यांनी क्षीरसागराचे मंथन केले आणि विष आणि अमृत बाहेर काढले. दैत्यांनी अमृत पळवले.

तेव्हा भगवान विष्णू देवांच्या मदतीला आले, त्यांनी मोहिनी या अप्सरेचे रूप धारण केले. आपल्या सौंदर्याने दैत्यांना गुंगवले आणि त्यांच्याकडून अमृत पळवून देवांना दिले. हे तिचे नृत्य देवदासींनी शिकले, म्हणूनच याला दासीअट्टमही म्हटले जाते. हे नृत्य चेरा राजवटीच्या काळात 9 ते 12 व्या शतकात खूप प्रसिद्ध होते.